Fikrət Yusifov: "Etimad səviyyəsi sıfra bərabər olan bir ölkə ilə bağlanacaq sülh müqaviləsi..."

Otuz il Azərbaycan torpaqlarını işğal altında saxlayıb, bu torpaqlarda  qanlı faciələr törətmiş cinayətkar Ermənistanı indi Qərbin sülh göyərçini kimi təqdim   etməsi ən azından siyasi əxlaqsızlıqdır! Bu qədər riyakar və ikiüzlü olmaq heç bir dövlətə və ya dövlətlər birliyinə şərəf gətirməz! Çox təəsüf ki, biz müstəqilliyimizin ilk günlərindən Qərbin dəfələrlə, utanmadan siyasi əxlaqı öz siyasi ambisiyalarının ayaqları altına atdığının şahidi olmuşuq. Qərb bu gün də Ermənistanla Azərbaycan arasında sülh müqaviləsinin bağlanması ətrafında eyni çirkin oyunları oynayır.
 
Torpaqlarımıza rəsmi iddialı olan bir terrorçu dövlətlə sülh müqaviləsi imzalamaq nə demək olar? Görəsən Qərbin siyasət dəllaları gerçəkdən Azərbaycanla Ermənistan arasında sülhün olmasını bu qədər ürəkdən istəyirlər? Biz torpaqlarımızın otuz illik işğalı dövründə belə bir istəyin işartılarını görmədik! Bəs indi nə baş verir?  İndi bunlara nə düşüb ki, qalib Azərbaycanı məğlub Ermənistanla yarımçıq sülh müqaviləsi bağlamağa səsləyib, dəridən-qabıqdan çıxırlar?  
 
Heç şübhəsiz belə yarımçıq sülh müqaviləsi bağlamağın nə demək olduğunu Qərbin siyasət köstöbəkləri çox yaxşı anlayırlar! Bu çirkin oyunların müəliflərini narahat edən əsas məsələ, Cənubi Qafqazda bir qaynar münaqişə ocağının tam qapadılmasıdır. Bu ocaq tam qapanarsa, o halda, illər sonra onu “yenidən diriltmək” mümkün olacaqmı kimi bir sualdı bunları rahatsız edən. Bu səbəbdən sülh müqaviləsinin zəruriliyindən danışarkən, Ermənistanın Azərbaycana qarşı  torpaq iddialarının aradan qaldırılması, ATƏT-n Minsk qrupunun ləğvi edilməsi kimi açıq qalmış məsələləri görməzdən gəlirlər. 
 
Torpaqlarımıza rəsmi təhdid ortada olduğu bir halda, Ermənistan kimi mayası yalandan tutulmuş, nəfəsi yalanla yoğrulmuş bir dövlətlə sülh müqaviləsi bağlamaq mümkündürmü? Əgər Ermənistan sülh müqaviləsini bu qədər çox arzu edirsə, qoy onda Azərbaycanın iki şərtini – konstitusiyada və digər hüauqi aktlarda torpaqlarımıza təhdidi aradan qaldırsın və ATƏT-n Mins qrupu adlı bic doğulmuş bir təşkilatın ləğv edilməsinə imza atsın. Ondan sonra biz sülh  müqaviləsini imzalaya bilərik. 
 
Sülh müqaviləsi ilə bağlı ən pis variant isə Ermənistanın yerinə yetirməli olacağı bu iki öhdəliyin sülh müqaviləsində əks etdirilməsi və müqavilənin bu şərtlər yerinə yetirildikdn sonra qüvvəyə minməsi ola bilər.
 
Biz yalnız bu tələblər yerinə yetirildikdən sonra sülh müqaviləsinə imza ata bilərik. Əks halda nə riyakar Qərbin nə də etimad səviyyəsi sıfra bərabər Ermənistanın ipinin üzərinə odun yığa bilmərik...
 
Fikrət Yusifov,
sabiq maliyyə naziri, professor

Original mənbə