SOCAR dünya enerji nəhəngləri ilə birgə İsrailin “Tamar” yatağında...

Fikrət Yusifov: “Bu, tək SOCAR-a deyil, Azərbaycana olan münasibətin ifadəsidir”

SOCAR Aralıq dənizində ən böyük qaz ehtiyatlarından birinə malik olan “Tamar” yatağında 10 faiz effektiv səhm payı əldə edib. Bu məqsədlə martın 17-də SOCAR-ın rəsmi nümayəndə heyəti İsrailə səfər edəcək. İsrailin “Tamar” qaz yatağında 10% paya malik olmaq üçün əvvəlcədən elan edilmiş saziş imzalanaraq, rəsmən təsdiqlənəcək.

Nümayəndə heyətinə iqtisadiyyat naziri Mikayıl Cabbarov rəhbərlik edəcək. Jurnalın İsraildəki mənbələrinə görə, SOCAR-ın tərəfdaşı BP-nin də bu yeni layihədə iştirakı istisna deyil. “Tamar” qaz yatağı dənizdə yerləşir və yataqdakı təbii qaz ehtiyatlarının təxminən 389 milyard kubmetr olduğu güman edilir. ABŞ-nin ən böyük karbohidrogen istehsalçılarından olan “Chevron”, “Tamar”ın 25%-nə sahibdir. Bu şirkət də SOCAR-ın konsorsiuma qoşulmasına razılıq verib.

Ümumilikdə, indiki şəraitdə İsraillə qaz emalı, yanacaq-enerji sahəsində imzalanan bu sazişin nə kimi strateji faydaları, əhəmiyyəti var? Azərbaycanın ABŞ-la münasibətləri konteksində nə kimi hədəfləri var?

“Bütün bunlar həm də Azərbaycanla Birləşmiş Ştatlar arasında münasibətlərin keyfiyyətcə yeni...”

Sözügedən məsələni “Bakı-Xəbər”ə şərh edən sabiq maliyyə naziri, professor Fikrət Yusifov bunun əhəmiyyətini yüksək qiymətləndirdi: “Türkiyə və Pakistandan sonra Azərbaycana ən yaxın dost ölkə İsraildir. Bu dostluğun uzun bir tarixi var. Bu münasibətlərin getdikcə dərinləşməsi isə olduqca yaxşı bir əlamətdir. Məsələ ondadır ki, İsrail 44 günlük İkinci Qarabağ savaşında bizim yanımızda dayanıb. O cümlədən, “biz dostlarımızın düşmənlərinə silah satmırıq” deyib Ermənistana müasir silahları satmaqdan imtina edən də İsrail oldu. Aralıq dənizində İsrailə məxsus qaz yatağında ABŞ və Böyük Britaniyanın dünyaca məşhur neft şirkətləri ilə bir arada olmaq tək SOCAR-a deyil, Azərbaycana olan münasibətin ifadəsidir. Hesab edirəm ki, bütün səviyyələrdən olan əlaqələrin alt qatında iqtisadi münasibətlər varsa, bu çox yaxşı bir hal kimi dəyərləndirilməlidi. Çünki iqtisadi münasibətlər dərinləşdikcə siyasi münasibətlərdə yaxınlaşma avtomatik şəkildə baş verir. Azərbaycan bu gün dünyada çoxsaylı ölkələrə nümunə ola biləcək xarici siyasət nümayiş etdirir. Bu düşünülmüş və uzaqgörən siyasətin ən böyük uğuru isə bölgədə bütün dünyanın gözləri qarşısında separatizmin köklərini ustalıqla kəsməyimiz oldu. Bu yolda bizim ən böyük dəstəkçilərimizdən biri də İsrail idi. Hesab edirəm ki, Azərbaycan İsraillə bütün sahələrdə əməkdaşlıq etməlidir. Biz bundan yalnız fayda əldə edə bilərik. Bütün bunlar həm də Azərbaycanla Birləşmiş Ştatlar arasında münasibətlərin keyfiyyətcə yeni mərhələyə keçməsinə, ölkəmizə daha çox önəm verilməsinə gətirib çıxaracaq. Çünki İsrail ABŞ-ın bir nömrəli müttəfiqidir”.

Vidadi ORDAHALLI

Original mənbə